支持動物拯救：捐款成就改變
你知道嗎？愛協僅有 1% 的資金來自政府資助，我們的運作依靠公眾的支持！你的捐款對於幫助我們繼續拯救生命的工作至關重要。
單是 2022 － 2023 年度，我們就營救了 4,600 多隻受傷或被困的動物，並通過 24 小時救援熱線 處理了 21,000 多個求助電話。
但我們無法獨自完成這些工作。
動物拯救基金有助我們培訓和調派更多愛協督察及增添拯救工具，以維持 24 小時免費救援服務。有了你的幫助，我們才能確保每一隻需要幫助的動物都能得到及時和有效的救助。
檢核部成立目的為要提升本港的動物福利，致力拯救有需要的動物，透過教育、檢核與動物有關的人士及調查和協助起訴懷疑虐待動物的個案，以防止動物承受不必要的痛苦。檢核部的工作所涉及的動物種類極之廣泛，包括有主人和被遺棄的寵物、野生動物、農場牲畜以至於在巿場及店舖販賣之動物亦包括在內。
畀魚絲纏腳嘅雀仔
愛協督察手記 – 2024年7月17日
7月17日上午，一名途人喺愛協青衣中心對面嘅建築工地，發現咗一隻倒掛咗喺一棵樹上面嘅黑領椋鳥。愛協督察好快去到現場，利用爬梯爬上樹。上到去距離地面約四呎，就見到呢隻雀仔。愛協督察安全捕獲雀仔，然後小心翼翼咁斬斷樹枝，將雀仔帶返落地面。
仔細一睇，佢哋發現呢隻雀仔嘅右腳畀魚絲纏住咗，令到佢受傷跛腳。愛協督察於是將呢隻雀仔送返青衣中心畀獸醫檢查同護理。
隨後，愛協督察將雀仔送到嘉道理農場暨植物園，由佢哋嘅護理團隊進一步密切照顧呢隻黑領椋鳥。
救出困喺叢林中嘅狗狗！
愛協督察手記 – 2024年6月27日
愛協督察執行任務時需要好多耐性同專業技能，經常面對各種挑戰，甚至會身處危險嘅環境。就好似今次呢單案件，愛協督察就要爬落叢林入面嘅斜坡！
6月27日，一個村民聽到長坑村一個叢林入面有狗狗嘅喊聲。愛協督察好快抵達，同消防、警方一齊展開救援行動。
搜救團隊發現狗狗畀藤蔓纏住。要成功救出狗狗，團隊小心翼翼咁剪開藤蔓之後，愛協督察仲要牽引住狗狗，爬過河流同山坡，最後終於同返主人團聚！雖然嗰日天氣非常熱，完成任務後成身泥漿同汗水，但我哋見到呢個大團圓結局都非常之開心呀！
貓貓捐咗入車引擎或車底位置…你應該點做？
愛協督察手記 – 2024年5月30日
5月30日晚，我哋接到消防處通報，有人發現一隻幼貓被困喺旺角一架巴士底下。愛協督察好快趕到現場，同現場消防員一齊喺巴士後轆發現隻貓貓。一輪努力後，終於利用控制桿成功救到佢出嚟！
呢隻貓貓當時得1.5個月大，接受檢查後，好彩健康情況正常，而家喺暫養家庭快樂成長中。貓貓經常想搵地方匿埋，我哋其實經常收到呢類報告。如果你懷疑你車下面或者附近有動物，請喺安全情況下停車熄匙，並報告情況畀交通警察，等佢哋控制交通以確保道路使用者安全。另外可以即刻聯絡愛協督察拯救動物。
深水埗「垃圾屋」藏 37 隻貓
愛協督察手記 – 2023年6月
深水埗一位居民發現樓上單位漏水但冇人應門，於是報警求助。點知發現單位入面唔只有好多垃圾，仲有 37 隻貓
屋入面環境非常惡劣，有唔少排泄物、污糟嘅飲用水同超多垃圾，惡臭連天。愛協督察足足係屋內花咗三日去搜索同捕捉全部貓。好可惜，其中一隻貓被發現時已經過咗身一段時間… 其後亦有獲救嘅貓貓相繼捱唔著離世呢間垃圾屋嘅其中一個生還者叫 Poppy，而家住喺愛協青衣中心領養部。佢之前嘅經歷導致佢雙眼有嚴重結膜炎，仲有好多其他病痛。不過喺愛協督察同動物照顧團隊嘅努力下，Poppy 而家已經好返好多，準備好展開貓生嘅新一頁！
拯救驚驚酒店貓
愛協督察手記 – 2023年4月19日
4月19日，愛協督察收到尖沙嘴一間酒店嘅求助電話，指有主人帶貓貓入住，但貓貓驚得濟，匿埋咗喺房間嘅浴缸後面已經三日。由於貓貓收埋自己嘅地方太隱蔽，主人同職員根本無法接觸到佢，只好向督察求助。
由於環境太陌生，貓貓嚇到唔敢出番嚟，就算督察點氹都無用。後來督察仔細分析過環境，喺確保貓貓安全嘅情況下，建議酒店職員請工程人員鑽開浴缸嘅另一面，等督察可以將鏡頭伸入去觀察住貓貓嘅狀況，而另一個督察就喺另一邊負責用貓網捉佢出嚟。經過多方面配合同努力，終於喺足足三小時之後成功將貓貓救出，無穿無爛咁將佢交番畀主人，放返入籠以免再嚇走貓貓。喺度都想多謝酒店職員幫手拯救貓貓，另外都要提醒各位貓奴要好好認清主子嘅性格，如果佢哋太怕事內向，就唔好帶佢外出啦，如真喺有需要，就將佢哋好好放入籠，同搵塊布遮住個籠，將佢哋嘅焦慮盡量減低。
拯救水渠底貓 B
愛協督察手記 – 2023年2月14日
當大家慶祝緊情人節時，愛協督察收到市民電話，指一隻貓B被困於古洞南路一個大約 4 米深的石水渠底（圖中紅圈位置）。督察到場後利用伸縮網成功將貓B救起，幸好貓B表面並沒明顯傷痕，但為安全起見督察即時將貓B送去愛協灣仔中心接受獸醫詳細檢查。現時貓B由暫託家庭照顧，戒奶後若身體情況穩定，就會送返中心，尋找牠餘下貓生的人類伴侶。
捐款
